Engin röskun á framkvæmdum við nýjan Landspítala vegna Covid-19

4. apríl 2020

Engin röskun hefur orðið á starfsemi NLSH ohf vegna Covid19 faraldursins. Starfsmenn vinna að mestu leyti frá heimastöð og jarðvegsframkvæmdir við Hringbraut eru á lokastigi.

Gunnar Svavarsson, framkvæmdastjóri Hringbrautarverkefnisins, segir að næstu skref séu að klára jarðvegsframkvæmdir og að bjóða út uppsteypuþáttinn í byggingu nýs Landspítala.

Forvalsþættinum sé lokið og fljótlega munu þau fimm fyrirtæki, sem talin eru hæf til að bjóða í uppsteypu nýs Landspítala, fá útboðsgögn til að geta boðið í verkið.

Stefnt er að því að uppsteypa geti hafist í júní.

Einnig er unnið samhliða að öðrum útboðum bæði tengd meðferðarkjarnanum og öðrum verkefnum.

Verktakafyrirtækin sem metin voru hæf til að bjóða í uppsteypuverkið eru:

Eykt, Íslenskir aðalverktakar, Ístak, Rizzani De Eccher og ÞG verktakar.

Nýr meðferðarkjarni verður um 70 þúsund fermetrar ásamt bílakjallara.