Eins og vegfarendur um Hringbraut hafa án efa veitt eftirtekt hefur klæðning á meðferðarkjarnanum gjörbreytt svipmóti byggingarinnar. Núna er svo komið að á austasta hluta byggingarinnar, sem kallast stöng 5, eru útveggjaeiningarnar í uppsetningu en verkinu er nánast lokið á vestari hlutanum. 

Verkfræðingafélag Íslands stóð nýlega fyrir rýniferð fyrir félagsmenn til Istanbúl í Tyrklandi. Alls voru um 170 þátttakendur í ferðinni þar af tveir starfsmenn frá NLSH. Dagskráin var fjölbreytt og má þar nefna skoðunarferð í Tækniháskólann í Istanbúl, þar sem verkfræðistofan Arup hafði skipulagt dagskrá með fyrirlestrum og skoðunarferð. Einn fyrirlesturinn var kynning Sigurjóns Sigurjónssonar, staðarverkfræðings hjá NLSH á framkvæmdum félagsins. Einnig voru fleiri fyrirlestrar svo sem kynning Tryggva Þórs Haraldssonar, fyrrverandi forstjóra RARIK, um stöðu orkumála á Íslandi. Af hálfu heimamanna var fyrirlestur um afleiðingar stórs jarðskjálfta sem varð í Tyrklandi í febrúar 2023 og hvernig brugðist var við miklum skemmdum á byggingum. Í lok ferðar var skoðunarferð í nýlegt listastafn Istanbul Modern þar sem Arup hafði séð um hönnun og eftirlit með framkvæmdum.