Fréttasafn: 2008

Vitanlega voru um það skiptar skoðanir meðal almennings og starfsmanna spítalanna, hvort sameina ætti sjúkrahúsin í Reykjavík árið 2000. En meginröksemdin fyrir sameiningunni var, að nú yrði stofnað til nútímalegs háskólasjúkrahúss, sem stæði undir nafni á alþjóðavísu, hvað varðaði stærð, fjölbreytilega þjónustu og vísindalegan grundvöll. Það var þessi sýn, sem olli því að langflestir læknar snerust til fylgis við sameininguna. Starfsmenn spítalanna og allur almenningur skildi líka þörfina fyrir nýja spítalabyggingu, sem leysti af hólmi úreltar og óhagkvæmar byggingar, og aðbúnaður sjúklinga yrði í samræmi við kröfur tímans og aðstæður í landinu. 

Íslendingar eru flestum þjóðum langlífari og ungbarnadauði er fátíðari hér en víðast hvar. Heilbrigði þjóðarinnar er meðal þess sem skipar Íslendingum í fremstu röð á samanburðarlistum yfir velsæld. Hér hefur byggst upp samfélag sem einkennist af háu menntunarstigi, efnahagslegri velsæld og góðri almennri heilbrigðisþjónustu.