Fréttasafn: janúar 2012

„Djúpir eru Íslandsálar, en þó munu þeir væðir vera," sagði tröllkonan sem ætlaði að vaða frá Noregi til Íslands. Íslenskir læknar í starfi ytra eru þó ekki eins bjartsýnir um heimkomu og tröllkonan forðum. Í huga þeirra er einkum tvennt sem veldur þeirri dökku sýn: Laun og önnur lífskjör eru betri í útlöndum en á Íslandi. Öll starfsaðstaða er víðast hvar til fyrirmyndar, oft svo að um munar. Hér er sérstaklega hafður í huga samanburður við stærsta vinnustað lækna á Íslandi, Landspítala-Háskólasjúkrahús. 

Er fyrirhuguð stækkun Landspítala gæluverkefni karla í lególeik?  Það má lesa úr skrifum Guðna Ágústssonar fyrrverandi  ráðherra sem skrifar grein í Fréttablaðið þann 17. janúar sl. undir yfirskriftinni: „Háskólaþorpið í Vatnsmýrinni“.

Þar ræðir hann áform um stækkun Landspítala. Guðni finnur það verkefninu einna helst til foráttu að það sé gæluverk karla og hefur að hluta til eftir Guðjóni Baldurssyni lækni sem nýverið líkti stækkun spítalans við leik barna með kubba.

Formaður nýs stjórnmálaafls Hægri grænna tjáir sig um nýja Landspítalann í Mbl. 14.jan. sl. og hallar réttu máli í flestum atriðum. Rétt er að upplýsa lesendur um staðreyndir þess helsta sem misfarið er með í grein formannsins.

Mestu varðar hverju nýbygging Landspítala skilar varðandi meðferðarárangur, öryggi og líðan sjúklinga.

Fyrst menn deila nú um Vaðlaheiðargöng sem alltof dýra framkvæmd eða Hólmsheiðartugthús, hvað með Landspítalaháskólasjúkrahús? Ein framkvæmdin kostar 2 milljarða, önnur 10 milljarða, sú þriðja 50 - til 100 milljarða?

Rekstrarlegur ávinningur sameiningar starfsemi Landspítala í Fossvogi og við Hringbraut með nýbyggingum spítalans er áætlaður 2,6 milljarðar á hverju ári. Með einfaldri deilingu má sjá að töf á nýbyggingu kostar samfélagið 7,1 milljón króna á hverjum sólarhring.

Guðjón Baldursson læknir skrifaði tvær greinar milli jóla og nýárs í Fréttblaðið þar sem hann kallaði fyrirhugaða byggingu nýs spítala á Landspítalalóðinni við Hringbraut „stórslys 21. aldarinnar". Það er ekki mitt að skipta mér af stílbrögðum annarra. En ég sé ekki betur en að Guðjón gefi sér forsendur, hvað varðar byggðaþróun og samgöngustefnu, sem ekki eiga sér stoð í veruleikanum og dragi af þeim stóryrtar ályktanir.

Í umræðunni um húsnæðismál Landspítala ættu þarfir sjúklinga að vera höfuðatriðið.

Allstórt svæði sunnan gömlu Hringbrautar hefur verið ætlað til uppbyggingar Landspítala samkvæmt skipulagi Reykjavíkurborgar frá árinu 1976. Það er því ekki nýlunda að byggja eigi upp sjúkrahússtarfsemi á lóðinni við Hringbraut.

Megintilgangur nýbyggingarinnar er að flytja starfsemina úr Fossvogi og sameina hana starfseminni á Hringbraut. Hafa þarf í huga að nú þegar er helmingur af starfsemi Landspítala við Hringbraut, fjórðungur er í Fossvogi og fjórðungur annarsstaðar. Stærstur hluti heilbrigðisvísindasviðs Háskóla Íslands er þegar við Hringbraut.