Fréttasafn: 2013

Í fjárlagafrumvarpi fyrir árið 2014 er hundrað milljónum króna varið til fyrirhugaðrar endurnýjunar bygginga Landspítalans við Hringbraut - nýs Landspítala.
Um er að ræða kostnað vegna hönnunar á sjúkrahóteli sem staðsett verður á lóð spítalans. Mun sá kostnaður dreifast á tvö ár, 2014 og 2015. Gert er ráð fyrir að byggingarframkvæmdir hefjist um leið og hönnun er lokið.

„Með þessari tillögu er lagt til að stíga fyrsta skrefið í átt að nauðsynlegri endurnýjun bygginga við Hringbraut á komandi árum þó fara þurfi hægar í það verkefni en áætlanir gera ráð fyrir,“ segir í frumvarpinu. 

Fréttina má sjá hér

Það skýrist í fjárlagafrumvarpinu sem lagt verður fram eftir tvær vikur hvort vinna við byggingu nýs Landspítala heldur áfram.  Fram kemur í máli Gunnars Svavarssonar formanns byggingarnefndar nýs Landsspítala að tryggja þurfi verkefninu rúmlega 100 milljónir í fjárlögum ef ljúka eigi fullnaðarhönnun vegna minnsta hluta verkefnisins sem er sjúkrahótelið.

Morgunblaðið birtir í dag grein þar sem fram kemur að Ríkiskaup hafi tilkynnt niðurstöðu forvals um hönnun bygginga Nýs Landspítala.

Ríkiskaup hafa tilkynnt niðurstöðu forvals um hönnun bygginga Nýs Landspítala við Hringbraut. Forvalið var tvískipt, annars vegar var um að ræða forval fyrir hönnun sjúkrahótels og bílastæðahúss og hins vegar fyrir hönnun meðferðarkjarna og rannsóknarhúss.

Kristján Þór Júlíusson segir endurbóta þörf í íslensku heilbrigðiskerfi. Varðandi byggingu nýs Landspítala segir hann að treysta þurfi grunn heilbrigðisþjónustunnar áður en hafist verður handa við byggingu. Hann segir að það eigi að byggja spítalann upp þegar réttar aðstæður skapast, ekki síst fjárhagslega og þegar fyrir liggur hvaða hlutverki spítalinn eigi að gegna í heilbrigðisþjónustu í landinu.

Fréttina má sjá hér: http://vb.is/frettir/94161/

Í Morgunblaðinu í dag kemur fram að sex umsóknir hafi borist í forvali fyrir hönnun nýrrar byggingar við Landspítalann. Annars vegar er um að ræða forval fyrir hönnun sjúkrahótels og bílastæðahúss og hins vegar fyrir hönnun meðferðarkjarna og rannsóknarhúss

Umsóknir þátttakenda í forvali fyrir hönnun nýrra bygginga við Landspítalann voru opnaðar hjá Ríkiskaupum í dag. Forvalið var tvískipt, annars vegar var um að ræða forval fyrir hönnun sjúkrahótels og bílastæðahúss og hins vegar fyrir hönnun meðferðarkjarna og rannsóknarhúss.

Sex hópar skiluðu inn gögnum fyrir hönnun sjúkrahótels og bílastæðahúss, en það voru Hnit verkfræðistofa hf., Kos, Arkitektastofan OG ehf. og Vsb verkfræðistofa ehf., Mannvit hf., Corpus 2 og Verkís hf. 

Læknafélag Reykjavíkur hvetur stjórnvöld til að hvika ekki frá áformum um byggingu nýs húsnæðis fyrir Landspítala, að því er fram kemur í ályktun sem samþykkt var á aðalfundi félagsins í vikunni.

Fundurinn lýsir yfir áhyggjum af húsnæðismálum Landspítalans og bendir á að nýtt húsnæði hafi verið forsenda fyrir sameiningu sjúkrahúsanna árið 2000.

Í tilkynningunni segir ennfremur: „Síðan þá hafa öll aðstöðumál verið í biðstöðu vegna væntanlegrar nýrrar byggingar. Ef stjórnvöld telja að ástandið í þjóðfélaginu komi í veg fyrir áætlaða nýbyggingu er nauðsynlegt að gera gagngerar breytingar á núverandi húsnæði. Þá þarf að flytja alla bráðastarfsemi í eitt hús þar sem bráðamóttaka er.

Kristján Þór Júlíusson heilbrigðisráðherra segir að ríkisstjórnin muni endurskoða áform um byggingu nýs Landspítala á næstunni, að því er fram kom í morgunútvarpi Rásar 2 í morgun.  Áformin séu stór og fullkomlega eðlilegt sé að ný ríkisstjórn vilji fara yfir málið. 

Forval sem auglýst var fyrir kosningar standi samt sem áður yfir í sumar eins og gert hafi verið ráð fyrir áður en ríkisstjórnarskipti urðu.

„Þetta eru mikil og stór áform og við þekkjum öll stöðu ríkissjóðs til að takast á við stór verkefni [...] það er fullkomlega eðlilegt að ný ríkisstjorn horfi þannig til hluta að hún vilji setja það verk í samhengi  við annað sem henni er ætlað að gera.“

Hann segir að ríkisstjórnin ætli að koma málum Landspítalans úr þeirri stöðu sem þau hafa verið í en það þurfi að gefa henni tíma til að ræða hvernig það verði gert.  
„Verkið heldur áfram í dag á þeim forsendum sem það gerði fyrir ríkisstjórnarskiptin, nema það liggur fyrir að núverandi stjórnarflokkar ætla sér að fara yfir þessi áform.“

Viðtalið við Kristján á Rás 2

Kynningarfundur fyrir væntanlega þátttakendur í forvali vegna útboðs á hönnun nýrra Landspítalabygginga var haldinn í gær. Þar kynntu aðstandendur verkefnisins ýmsa þætti er varða fyrirhugaðar byggingar og svöruðu spurningum.

Það þýðir ekki að fresta uppbyggingu Landspítalans og styrkja þess í stað heilbrigðisþjónustu á landsbyggðinni, sagði yfirlæknir á Egilsstöðum í samtali við fréttastofu RÚV á dögunum. Gera verði hvort tveggja.