Fréttasafn: 2013 (Síða 3)

Hefja þarf byggingu sameinaðs háskólasjúkrahúss án tafar, að mati Egilberts Sigurðssonar, yfirlæknis geðsviðs LSH og ritstjóra Læknablaðsins. Í nýjasta hefti Læknablaðsins ritar Engilbert leiðara sem ber yfirskriftina „Hætta á neyðarástandi á Landspítala“ en þar fjallar hann um þær ógnir sem steðja að starfsemi spítalans, einkum húsnæðisvanda, mannauðsvanda og úreldan tækjabúnað. 

Lúðvík Geirsson, annar varaformaður fjárlaganefndar Alþingis, segir í viðtali við mbl.is að frumvarp um fjármögnun nýs Landspítala þurfi að koma inn á borð nefndarinnar í febrúar þannig að hægt verði að afgreiða það fyrir þingfrestun. 

Sigríður Gunnarsdóttir, framkvæmdastjóri hjúkrunar á Landspítala, segir meðal annars í viðtali við fréttavefinn mbl.is að mikið af húsnæði Landspítala ekki byggt fyrir þá starfsemi sem fari þar fram í dag, þar vanti bæði einbýli og salerni. Sá skortur leiði til þess að erfiðara sé að kljást við farsóttir.

Verkefnið um nýjan Landspítala var kynnt á Læknadögum 2013 sem haldnir voru í Hörpu liðna viku. Fjölmargir lögðu leið sína um kynningarbás verkefnisins en þau Jóhannes M. Gunnarsson læknir, Gyða Baldursdóttir hjúkrunarfræðingur og Gísli Georgsson verkfræðingur, öll verkefnisstjórar fyrir Nýjan Landspítala, fræddu gesti um verkefnið.  

Már Kristjánsson, yfirlæknir á smitsjúkdómadeild Landspítala, segir að skortur á einbýlum sé ein meginástæða fyrir kröfu um nýjan spítala, að því er fram kom í frétt Stöðvar 2 um helgina.

Morgunblaðið greindi frá því í dag að myglusveppur hafi komið upp í nokkrum herbergjum í byggingu Landspítalans við Hringbraut. Björn Zoëga, forstjóri Landspítalans, segir að verið sé að meta það hvort loka þurfi herbergjum og legurýmum.