Fréttasafn: 2012 (Síða 3)

Núverandi húsnæði getur ekki lengur tekið við þeim tækjabúnaði sem þarf til að nútímalækningar verði stundaðar vegna skorts á rými, lofthæð og burðarþoli, að því er kemur fram í grein Jóhannesar M. Gunnarssonar, læknisfræðilegs verkefnisstjóra Nýs Landspítala sem birt var í Fréttablaðinu í dag.

EItt af stóru verkefnunum sem Íslendingar standa frammi fyrir er bygging nýs Landspítala við Hringbraut, að því er fram kom í máli Guðbjarts Hannessonar velferðarráðherra í umræðum um fjárlagafrumvarp ársins 2013 á Alþingi.

Endurnýjun Landspítala við Hringbraut snýst ekki um lúxus og er mál alls samfélagsins. Þetta kemur fram í viðtali Fréttatímans við Bylgju Kærnested, hjúkrunardeildarstjóra hjartadeildar Landspítala.

Óli Kristján Ármannsson blaðamaður skrifaði í ritstjórnargrein helgarútgáfu Fréttablaðsins að Landspítalinn ætti ekki heima í miðbænum, þar sem hann er nú. Óli Kristján vill heldur hafa hann í útjaðri byggðarinnar; jafnvel uppi á Hólmsheiði eða á Vífilsstaðatúni fyrir ofan Garðabæ. Hann telur að það sé arfavitlaus meinloka að hafa væntanlega nýbyggingu Landspítala Háskólasjúkrahúss við Hringbraut.

Vegna umræðu um fyrirhugaða stækkun Landspítala við Hringbraut og stærð húsnæðis þar, vill Nýr Landspítali ohf. koma upplýsingum á framfæri.

Núverandi byggingar spítalans við Hringbraut, sem notaðar verða til framtíðar, eru 56 þúsund fermetrar. Að auki er Háskóli Íslands með starfsemi í Læknagarði. 

Reykjavíkurborg hefur auglýst tillögu að nýju deiliskipulagi fyrir Landspítala við Hringbraut. 

Tillagan tekur til skipulags framtíðaruppbyggingar fyrir Landspítala, Heilbrigðisvísindasvið Háskóla Íslands og Tilraunastöð Háskóla Íslands í meinafræði að Keldum, á stækkaðri lóð við Hringbraut, segir í auglýsingu borgarinnar. 

Þriðji hver Íslendingur, hvaðanæva af að landinu fær árlega þjónustu á Landspítala. Því er endurnýjun spítalans, sem nú stendur fyrir dyrum, mál allra landsmanna. Hagur sjúklinga er hafður í fyrirrúmi við þá uppbyggingu sem framundan er. Nýr spítali mun tryggja að Landspítali standi undir nafni sem þjóðarspítali sem tryggir að íslensk sjúkrahúsþjónusta standi jafnfætis þjónustu í löndum sem við berum okkur saman við. Með samhliða uppbyggingu Heilbrigðisvísindasviðs Háskóla Íslands skapast vel boðlegt kennslu- og rannsóknarumhverfi háskólaspítala.

Mikill akkur er í því að endurnýja spítalann. Endurnýjunin mun í senn auka öryggi sjúklinga, bæta meðferðarmöguleika og aðstæður og skapa hagkvæmara rekstrarumhverfi.  Áætlanir gera ráð fyrir að lokið verði við fyrsta áfanga í ársbyrjun 2018.

Fyrirhuguð endurnýjun Landspítala við Hringbraut snýst fyrst og fremst um bætta þjónustu við sjúklinga og aðstandendur þeirra. Gjörgæsludeild Landspítala í Fossvogi eflist mjög við flutning í nýtt húsnæði á nýjum spítala. Þar munu gjörgæsludeildir í Fossvogi og Hringbraut sameinast á einum stað, sem hefur í för með sér ýmsa kosti og hagræðingu.

Sífellt aukin krafa er á gæða- og öryggismál á sjúkrahúsum. Reynslan sýnir að sjúkrahús á Vesturlöndum eru ekki eins örugg og halda mætti og á undanförnum árum hefur orðið mikil vitundarvakning um þessi mál og öflug alþjóðasamtök sett þau í forgang. Neytendur gera vaxandi kröfur til þess að þjónustan sé bæði skilvirk og örugg. Segja má að spítalar séu í eðli sínu óöruggir, vegna þeirra flóknu verkefna sem þeir sinna og þess hversu viðkvæmir skjólstæðingar þeirra eru. Þess vegna er brýnt að gera sérstakar ráðstafanir á sjúkrahúsum til að auka öryggi og gæði þjónustunnar og vinna stöðugt að umbótum á starfseminni.

Stórstígar breytingar eru á starfsemi sjúkrahúsa frá ári til árs. Miklar framfarir hafa undanfarið orðið í rannsóknum og meðferð sjúklinga, sem margar hverjar fela í sér nýjar tæknilausnir. Þær þjóðir sem vilja bjóða sjúklingum góða þjónustu standa því frammi fyrir áskorunum um að reisa nýjar byggingar sem hæfa nútímalegri sjúkrahússtarfsemi. Nýbygging Landspítala við Hringbraut snýst um að íslensk sjúkrahúsþjónusta haldi takti við þróun þekkingar og tækni.

Guðlaugur Gauti Jónsson arkitekt skrifar grein í Fréttablaðið fimmtudaginn 31. maí um nýjan Landspítala. Það er ekki mitt að finna að stílbrögðum annarra. Ég tel þó nauðsynlegt að leiðrétta Guðlaug Gauta því hann gefur sér rangar forsendur og dregur af þeim stóryrtar fullyrðingar. 

Í stuttri grein Sighvats Björgvinssonar í Fréttablaðinu 24. maí sl. þar sem hann þakkar fyrir svar mitt við grein hans í sama blaði mánudaginn 21. maí ber hann enn fram nokkrar spurningar sem sjálfsagt er að svara.